கவுதமும் நானும் ஓடிப் பிடிச்சு விளையாடுவோம் லட்சுமி மேனன் ஓப்பன் டாக்

11/8/2013 11:55:03 AM

பேச வேண்டும் என்றால் உடலை சோம்பலுடன் முறிப்பார். பேச ஆரம்பித்தால் சகஜமாகி விடுவார். எப்படிப்பட்ட கேள்விக்கும் சட்டென்று பதில் கிடைக்கும். அதுதான் லட்சுமி மேனன் ஸ்பெஷல்.

கவர்ச்சிக்கு எதிரின்னு சொல்லிட்டு, குத்தாட்டம் போட்டிருக்கீங்களாமே?
நான் அப்பவும் சொன்னேன், இப்பவும் சொல்றேன், எப்பவும் சொல்வேன், ஒரு படத்துல கூட கவர்ச்சியா நடிக்க மாட்டேன்னு. சொன்னா நம்புங்க. ஜிகர்தண்டாவுல இட்லி கடை நடத்துற பொண்ணு. ஒரு பாட்டுக்கு மட்டும் எக்குத்தப்பா குத்தாட்டம் போடணும்னு சொன்னாங்க. எனக்கு அது சவுகரியமா இருந்தது. ஆட்டம் போட்டேன். அதுல கிளாமர் இருக்காது.

ரொம்ப குண்டாயிட்டீங்களே?
நான் சாப்பாட்டு ராமி. வயித்துக்கு வஞ்சனை பண்ண மாட்டேன். இஷ்டம் போல சாப்பிடுவேன். பிரியாணி ரொம்ப பிடிக்கும். சிக்கன்ல பண்ண அயிட்டங்களை மூக்கு முட்ட சாப்பிடுவேன். எக்சர்சைஸ் பண்றதில்ல. அதுல பெரிய ஆர்வம் இல்ல. டயட் இருக்க மாட்டேன். நான் இவ்வளவு கஷ்டப்பட்டு பணம் சம்பாதிக்கிறதே சாப்பிடறதுக்குதான். பிறகு எதுக்கு சாப்பாட்டை டைட் பண்ணணும்? மாடர்ன் டிரெஸ்ல ஒருமாதிரி இருப்பேன். புடவை கட்டினா, குண்டா இருக்கிற மாதிரி தெரிவேன். நான் எப்பவும் போல சரியாத்தான் இருக்கேன்.

நிறைய படம் பண்ணலையே?
கால்ஷீட் கொடுக்க தேதி வேணுமில்லையா? சித்தார்த் கூட ஜிகர்தண்டா, விமல் கூட மஞ்சப்பை, கவுதம் கார்த்திக் கூட சிப்பாய் பண்றேன். புதுப்படங்கள்ல நடிக்க பேச்சுவார்த்தை நடந்து கிட்டிருக்கு. ஒரே நேரத்துல நிறைய படம் ஒப்புக்கிட்டா, அப்புறம் கால்ஷீட் பிரச்னை வந்துடும். அந்த மாதிரி எந்த பிரச்னைலயும் சிக்கிடக் கூடாதுன்னு தான் ஒவ்வொரு படத்தையும் பார்த்து, பார்த்து ஏத்துக்கிறேன்.

எந்த ஹீரோ ரொம்ப கம்பர்ட்டபிள்?
சசிகுமார் ஜோடியா சுந்தரபாண்டியன், குட்டிப்புலி, விக்ரம் பிரபு ஜோடியா கும்கி, விஷால் ஜோடியா பாண்டிய நாடு படங்கள்ல நடிச்சிருக்கேன். எல்லாரும் எனக்கு சப்போர்ட் பண்ணாங்க. இப்ப சித்தார்த், விமல், கவுதம் கார்த்திக் ஜோடியா நடிச்சுகிட்டிருக்கேன். இவங்கள்ல எனக்கு கம்பர்ட்டபிளா இருப்பவர் கவுதம் கார்த்திக். நானும் அவரும் ஒரே கிளாஸ்ல படிக்கிற ஸ்டூடன்ட் மாதிரி ஃபீல் பண்றோம். ஓடிப் பிடிச்சு விளையாடுவோம்.

சூர்யா கூட நடிக்க ஆசையாமே?
ஒரு படத்துலயாவது அவருக்கு ஜோடியா நடிக்கணும். ஆனா, எனக்கு பிடிச்ச நடிகர், சித்தார்த்.

மலையாளத்துல நடிக்க மறுக்கறீங்களாமே?
மலையாளத்துல நடிச்சிட்டுதானே தமிழுக்கு வந்திருக்கேன். இப்ப கேரளாவுல தினமும் ஸ்கூலுக்கு போய்கிட்டிருக்கேன். என் அம்மா டீச்சரா வேலை பார்க்கிற ஸ்கூல்ல, பிளஸ் ஒன் படிக்கிறேன். நான் சினிமாவுல நடிக்கிறதை தெரிஞ்சுகிட்டு, ஸ்கூல் நிர்வாகமும் எனக்கு லீவு கொடுத்து கிட்டிருக்கு. அதை நான் மிஸ் யூஸ் பண்ணாம, ஷூட்டிங் முடிஞ்சதும் படிக்க போயிடுவேன். கேரளாவுல யாருக்கும் என்னை பெருசா அடையாளம் தெரியாது.

படிப்புல எப்படி?
ஆவரேஜ் ஸ்டூடன்ட்தான். இப்படி சொல்றதுல எனக்கு எந்த சங்கோஜமும் கிடையாது. அதுவும் கணக்கு பாடத்துல நான் ரொம்ப வீக். எத்தனைமுறை சொன்னாலும் மண்டையில ஏறவே ஏறாது. அதேமாதிரி, நான் அழகான பொண்ணும் கிடையாது. பக்கத்து வீட்டு பொண்ணை பார்க்கிற மாதிரி, சாதாரண தோற்றம்தான். முகத்துல இருக்கிற வடு, அடிஷனல் அட்ராக்ஷன் கொடுக்கிறதுனால, அதை பிளாஸ்டிக் சர்ஜரி பண்ணி மறைக்கிற ஐடியாவையும் விட்டுட்டேன்.

சினிமாவுல உங்க பிளான் என்ன?
அப்படி எதுவும் இல்ல. எந்த லட்சியமும் கிடையாது, எந்த ஆசையும் கிடையாது. நடிக்க வருவேன்னு நினைச்சதில்ல. நடிகையாயிட்டேன். கும்கி மூலமா இவ்வளவு வரவேற்பு கிடைக்கும்னு எதிர்பார்க்கல. ஆனா, என்னையும் நடிகையா ஏத்துகிட்டு ஆதரவு கொடுக்கிறாங்க. அந்தவிதத்துல நான் லக்கி. கொடுத்த கேரக்டரை கெடுக்காம நடிச்சா போதும்னு நினைக்கிறேன்.

நல்லா சமைப்பீங்களா?
ஆமா. சைவம், அசைவம் ரெண்டும் சமைப்பேன். ஆனா, வீட்ல என்னை சமையல் ரூம் பக்கமே விட மாட்டாங்க. ஏன்னா, அலமாரியில இருக்கிற எல்லா பொருளையும் எடுத்து கீழே கொட்டிடுவேன். ஏன் இப்படி செய்யறேன்னு எனக்கே தெரியாது.

பாட்டு கத்துக்கிட்டீங்களாமே?
அம்மா, டான்ஸ் கத்து கொடுக்கிறாங்க. சென்னை பெசன்ட் நகர் கலாஷேத்ராவுல கூட இருந்தாங்க. பாட்டி மியூசிக் டீச்சர். நானும் நல்ல பாடகிதான்.

Tags:

Movie Gallery

-----