வெண்மேகம்

2/22/2014 11:32:04 AM

விதார்த், ஜெகன் இருவருக்கும் வரைவது வேலை. ரோகிணியின் மகள் ஜெயஸ்ரீ சிவதாஸ், விதார்த்திடம் ஜாலியாகப் பழகுகிறார். ரோகிணி அதை கண்டிக்கிறார். மனம் வெறுக்கும் ஜெயஸ்ரீ, வீட்டை விட்டு வெளியேறி, விசாகப்பட்டினம் சென்றிருக்கும் விதார்த்தை தேடி அலைகிறார். அங்கு அப்பாவிப் பெண்களை வாடகைத் தாயாக மாற்றி கொடுமைப்படுத்தும் லேடி தாதாவிடம் சிக்குகிறார். அவரைத் தேடி விதார்த் செல்கிறார். ஜெயஸ்ரீ கிடைத்தாரா, இல்லையா என்பது கதை. வீட்டை விட்டு வெளியேறும் டீன் ஏஜ் பெண்கள், சமூக விரோதிகளிடம் சிக்கி படும் அவஸ்தைகளை, மனம் அதிரும்படி சொல்லி0 இருக்கிறார்கள். ஓவியர்களாக வரும் விதார்த், ஜெகன் காம்பினேஷன் ஓ.கே ரகம். இஷாராவை கண்டதும் காதல்கொள்வதும், ஜெயஸ்ரீயை செல்லம் கொஞ்சுவதும், தன் பாசத்தை ரோகிணி தவறாகப் புரிந்துகொண்டதை அறிந்து துடிப்பதும் விதார்த்துக்கு எளிதில் வருகிறது.

ஜெயஸ்ரீ, வீட்டை விட்டு வெளியேறிய பழி தன் மீது விழ, போலீசிடம் அடி வாங்கி அனுதாபம் அள்ளுகிறார். சிரிக்க வைப்பதற்காக பஞ்ச் டயலாக் அடிக்கும் ஜெகன், சில இடங்களில் இரட்டை அர்த்தத்தில் பேசி எரிச்சலூட்டுகிறார். அதிக வேலை இல்லை இஷாராவுக்கு. கொடுத்ததை கச்சிதமாக செய்திருக்கிறார். நடிப்பில் முதலிடம் ஜெயஸ்ரீக்கு. மாணவியாக துறுதுறுவென்று வலம் வரும் அவர், விதார்த்தை நேசிப்பது குதர்க்கம். வீட்டை விட்டு வெளியேறி விதார்த்தை தேடி அலையும்போது, மஞ்சரியின் ஆசை வார்த்தைகளில் மயங்கி மாட்டிக்கொள்வது பதைபதைக்க வைக்கிறது.

தனது கண்டிப்பினால்தான் மகளுக்கு இந்த நிலை ஏற்பட்டது என்றறிந்து துடிக்கும் ரோகிணி, கதறி அழுவது சோகத்தின் உச்சம். ஜித்து தாமோதரின் ஒளிப்பதிவில், ஒடிசா பூந்தோட்டம் சுவிட்சர்லாந்தாக மிளிர்கிறது. ஜாபர் ஹனியின் இசையில் பாடல்கள் ஓ.கே. பின்னணி இசையில் காட்சிகளுக்கான அழுத்தம் குறைவு. சீனு ஆர்.வாசனின் வசனங்களில் யதார்த்தம்.

விதார்த்தை ஜெயஸ்ரீ காதலிப்பதற்கு சரியான காரணம் இல்லை. வயதுக்கு வந்த மாணவி காணாமல் போன விஷயத்தை போலீஸ் கண்டுகொள்ளாமல் இருப்பது நெருடல். மஞ்சரி செய்யும் பகீர் பிசினஸ், ஆந்திர போலீசுக்கு தெரியாதது எப்படி? இப்படி சில கேள்விகள் எழுவதை தவிர்த்திருந்தால், படம் இன்னும் கவனம் ஈர்த்திருக்கும்.

Tags:

Movie Gallery

-----