இது யூத்ஃபுல் யுவன் சீஸன். அவர் தயாரித்த பியார் பிரேமா காதல் கொடுத்த அதிரிபுதிரி ஹிட்டில் ரொம்ப ஹேப்பியாக இருக்கிறார். விஷால், லிங்குசாமியோடு கைகோர்த்த சண்டக்கோழி-2வுக்கும் செம ரெஸ்பான்ஸ். இப்போது மீண்டும் செல்வராகவனுடன் என்.ஜி.கே கூட்டணி. தனுஷுடன் மாரி-2, சத்யசிவாவுடன் கழுகு-2 என வரிசை கட்டி நிற்கும் பார்ட் 2 அட்ராசிட்டி. இது போக இன்னும் அரைடஜன் படங்களின் இசைக்கோர்ப்பு வேலைகள் என செகண்ட் இன்னிங்ஸிலும் செம ஸ்கோர் செய்து வருகிறார் யுவன்ஷங்கர் ராஜா. ஓர் இனிய மழைநாளில் அவரிடம் வாட்ஸப் காலிங்கில் பேசினோம். நான் இசைத்துறைக்கு வந்து இருபத்தொரு வருஷம் ஆச்சு. ஏற்ற இறக்கங்களை எல்லாம் சந்திச்சாச்சு. என்னோட எல்லா சூழ்நிலைகளிலும் என் ரசிகர்கள் என்னோடவே பயணப்படுறது என்னோட அதிர்ஷ்டம். அப்பாவுக்கு இருக்கறது மாதிரி எனக்கும் நிலையான ரசிகர்கள் கிடைச்சிருக்கறதை இறைவனோட அருளாகவே பார்க்கறேன். அவங்களுக்கு எப்படி நன்றி சொல்றதுனே தெரியல. என்னோட ஒர்க் மூலமாகத்தான் அவங்கள நான் சந்தோஷமா வச்சிருக்க முடியும்னு நம்புறேன். அவங்களுக்காகத்தான் பியார் பிரேமா காதலை தயாரிக்க தோணுச்சு. அந்தப் படம் நிச்சயம் ஹிட் ஆகும்னு எதிர்பார்த்ததுதான். ஆனா, இவ்ளோ பெரிய சக்சஸ் எங்க எல்லாருக்குமே சர்ப்ரைஸ். நான் படம் தயாரிக்கலாம்னு முடிவு பண்ணிட்டு அப்பாவை போய்ப் பார்த்தேன். நல்ல விஷயம். கவனமா பார்த்து பண்ணுனு சொன்னாங்க. அவங்க சொன்ன ஒரே அட்வைஸ் அதான். படத்தோட ஆடியோ ஃபங்ஷனுக்கு அவங்க கூட வந்து ஆசீர்வதிச்சாங்க. இப்படி எல்லோரோட ஆசீர்வாதங்களும் முதல் தயாரிப்புக்கு கிடைச்சிருக்கறது சந்தோஷமா இருக்கு...அப்போதைய காதல் கொண்டேன், இப்போதைய பியார் பிரேமா காதல் இடையிலே ஒரு ஜெனரேஷன் கேப் இருக்கு. நீங்க எப்படி இந்த இடைவெளியை சமாளிக்கிறீங்க?இசைக்கு தலைமுறை கிடையாது. ஆனா, ரசனை மட்டும் மாறும். காதல் கொண்டேன் டைம்ல அன்னிக்கு உள்ள ரசனைக்கு தேவையான இசைக்கருவிகளை பயன்படுத்தியிருப்பேன். பியார்ல இன்னிக்கு உள்ள இளைஞர்களுக்கான சவுண்ட்ஸை பயன்படுத்தியிருக்கேன். ஆனா ஒரு விஷயம்.. அன்னிக்கும் சரி, இன்னிக்கும் சரி லவ் என்கிற எமோஷன் என்னிக்குமே ஒண்ணுதான். அதில் எந்த மாற்றமுமில்லை.எலெக்ட்ரானிக் கருவிகளை விட்டுவிட்டு உண்மையான இசைக்கருவிகளை உபயோகப்படுத்தினால் தான் அது ஆன்மாவை எழுப்பும்னு இளையராஜா சொல்லியிருக்காரே..?அப்பா கரெக்ட்டாகத்தான் சொல்லியிருக்காங்க. இன்னிக்கு அதானே நிலைமை. ஒவ்வொரு சவுண்டுக்கும் நம் மூளையின் செல்கள் எப்படி ரியாக்ட் பண்ணுதுனு விஞ்ஞானபூர்வமாகவே நிரூபிச்சிருக்காங்க. இப்ப இசைக்கான மார்க்கெட் கூட அதை நோக்கித்தான் போய்க்கிட்டிருக்கு. ஆனா, படங்கள்தான் எந்த இசைக்கருவிகளை பயன்படுத்த வேண்டும் என்பதை தீர்மானிக்குது.தயாரிப்பில் அடுத்து..?சீனுராமசாமி இயக்கத்தில் விஜய்சேதுபதி நடிக்கும் மாமனிதன் படத்தை தயாரிக்கறேன்னு உங்களுக்கு தெரிஞ்சிருக்கும். இதுக்கு இசையமைக்க அப்பா சம்மதிச்சது எனக்கு பெரிய ஆசீர்வாதம். அதைத் தொடர்ந்தும் படங்கள் புரொட்யூஸ் பண்ற ஐடியா இருக்கு.நாங்க ரிலாக்ஸ் ஆக, இளையராஜா பாடல்கள்தான் கேட்கறோம். நீங்க...?நானும் அப்பாவோட பாடல்கள்தான் கேட்குறேன். அவரோட பாடல்கள் எல்லாமே பிடிக்கும். அதிலும் தென்றல் வந்து தீண்டும் போது, நான் தேடும் செவ்வந்திப்பூவிது ரெண்டுமே என்னோட ஆல் டைம் ஃபேவரிட். உங்க இசையில் சூஃபியின் தாக்கம் இருக்குதுனு சொல்றாங்களே..?நிஜம்தான். ஒரு பாயின்ட் ஆஃப் டைமுக்கு மேல எல்லாருக்குமே ஆன்மீகத் தேடல் நிச்சயம் இருக்கும். புகழ், பணம் எவ்வளவு அதிகமானாலும் சரி.... அதெல்லாம் நிரந்தரமில்லைனு ஒரு காலகட்டத்திற்குப் பிறகு இயல்பாகவே புரிஞ்சுக்குவோம். அந்த டைம்ல ஆறுதலாகவும் ஆன்மாவின் தேடலாகவும் இருப்பது ஆன்மீகம்தான். அந்த ஆன்மீகத் தேடலாகத்தான் இசையில் சூஃபியிஸம் வெளிப்படுது.