வாய்ப்புகளை டாப்ஸி மறுக்கும் மர்மம்
பல்வேறு மொழிப் படங்களில் நடித்து வரும் டாப்ஸி, பாலிவுட்டில் பெண் கதாபாத்திரங்களுக்கு முக்கியத்துவம் கொண்ட ‘பிங்க்’, ‘முல்க்’, ‘தப்பட்’ போன்ற படங்களில் நடித்து, தனக்கென்று ஒரு இமேஜை ஏற்படுத்தியுள்ளார். அவர் நடித்த ‘காந்தாரி’, நெட்பிளிக்ஸ் தளத்தில் நேரடியாக வெளியாகிறது. இந்நிலையில் அவர் கூறுகையில், ‘திரைத்துறையில் ஈடுபட்ட பலர், தங்கள் பாதுகாப்பு வட்டத்துக்குள் இருந்தபடி, ஏற்கனவே வெற்றி பெற்ற முறையையே மீண்டும், மீண்டும் பின்பற்றுகின்றனர். கிளாமர் கேரக்டருக்கு என்றால் சில நடிகைகளையும், சமூக பிரச்னைகளை மையப்படுத்திய படங்கள் என்றால் சில நடிகைகளையும் முதல் முடிவாக தீர்மானித்து வைத்துள்ளனர்.
இதற்காகத்தான் பல வாய்ப்புகளை நான் மறுத்துவிடுகிறேன். சில கதைகளை கேட்கும்போது, படத்தின் முடிவு எளிதில் யூகிக்கக்கூடியதாக இருந்தால், ‘என்னை இதில் நடிக்க வைக்காதீர்கள். இது அந்த படத்துக்கே பாதகமாக முடியும்’ என்று வெளிப்படையாக சொல்லிவிடுவேன். எனது திரையுலக பயணத்தின் தொடக்கத்தில் இருந்தே வணிகரீதியான மற்றும் எளிமையான கேரக்டர்களில் நடிக்கும் வாய்ப்புகள் எனக்கு கிடைக்கவில்லை. அதுபோன்ற கேரக்டர்கள் நடிகைகளுக்கு எளிதில் லாபத்தையும், பிரபலத்தையும் தரக்கூடியவை. அது கிடைக்காத நிலையில் வேறொரு பாதையை தேர்வு செய்தேன். எனது நல்ல நேரமோ என்னவோ, நான் நடித்த அந்த படங்கள் எல்லாம் திரையுலகின் முக்கிய படைப்புகளாக மாறிவிட்டன’ என்றார்.