ஸ்வீட்டி நாட்டி கிரேசி விமர்சனம்...
ஒரே கல்லூரியில் படிக்கும் திரிகுண், ஸ்ரீஜீத்தா கோஷ் ஜோடியின் காதல், திடீரென்று காமத்தில் முடிகிறது. அப்போது திரிகுண், ஏற்கனவே தன்னைவிட அதிக வயது பெண்களுடன் அத்துமீறியதை சொல்கிறார். இதனால் கோபமடைந்த ஸ்ரீஜீத்தா கோஷ், திடீரென்று அவரை ரிஜிஸ்டர் மேரேஜ் செய்துகொண்டு வீட்டுக்கு அழைத்து வருகிறார். இதனால் சந்தோஷமடைந்த திரிகுண், தனது மனைவி அறிமுகம் செய்து வைத்த அம்மா ராதா, அக்கா இனியா ஆகியோரை பார்த்து அதிர்ச்சி அடைகிறார். அதற்கு என்ன காரணம்? முடிவு என்ன என்பது மீதி கதை.
அடல்ட் காமெடி படம் என்பதால், வரைமுறை இல்லாமல் டபுள் மீனிங் டயலாக்குகளையும், எல்லை மீறிய கவர்ச்சியான காட்சிகளையும் படத்தில் வைத்திருக்கின்றனர். ஸ்ரீஜீத்தா கோஷ், ‘சுந்தரா டிராவல்ஸ்’ ராதா, இனியா என்று, மூவருடனும் திரிகுண் செம லூட்டி அடித்துள்ளார். அவர்களுடனான நெருக்கமான அத்துமீறிய காட்சிகளை ஒருசாரார் மட்டுமே ரசிப்பார்கள்.
ஸ்ரீஜீத்தா கோஷ், ராதா, இனியா ஆகியோர் துணிச்சலுடன் நடிக்க, கதைதான் காரணம் என்று சொன்னாலும் சொல்வார்கள். ராதாவின் கணவராக தம்பி ராமய்யா, இனியாவின் கணவராக சத்யன் ஆகியோரின் ‘ஏ’ ரக காமெடி, ஓவர். ஆலி, ரவிமரியா, ஜாவா சுந்தரேசன், மதன்பாப், தனசேகர், வினோத் ஆகியோரின் காமெடிகளில் காமநெடி அதிகம். ஹீரோயின்களின் அழகை மட்டுமே சி.விஜய்ஸ்ரீ கேமரா பளிச்சென்று காட்டியிருக்கிறது.
அருணகிரி இசையில் எல்லா பாடல்களும் வியாபார யுக்திக்காகவே படமாக்கப்பட்டுள்ளது. பின்னணி இசை, ‘உள்ளேன் அய்யா’ ரகம். எடிட்டர் கே.குமாரின் கத்தரி ரொம்ப ‘தாராளம்’ காட்டியுள்ளது. வக்கிரமான கதையாக இருந்தாலும், அதை பூசி மெழுகி திரைமொழியில் சொல்லியிருக்கும் ராஜசேகர்.ஜி, காமெடி என்ற பெயரில் குடும்ப உறவுமுறைகளை காயப்படுத்தி இருப்பது ஏற்புடையதல்ல. எழுதிய அவர் சற்று மாற்றி யோசித்திருக்கலாம்.