பெண்களை கவர்ச்சிப் பொருளாக சித்தரிப்பதா? ராசி கன்னா வேதனை

சென்னை: இந்திய படவுலகை பொறுத்தவரையில், பெண்கள் வெறும் கவர்ச்சிப் பொருளாக பயன்படுத்தப்பட்டு வருவதாகவும், அவர்களின் திறமைக்கு முக்கியத்துவம் அளிக்கப்படுவது இல்லை என்றும் நீண்ட காலமாக பல்வேறு குற்றச்சாட்டுகள் முன்வைக்கப்பட்டு வருகின்றன. இந்நிலையில் தமிழ், தெலுங்கு, இந்தி ஆகிய மொழிகளில் பல படங்களில் ஹீரோயினாக நடித்தவரும், பாடகியுமான ராசி கன்னா இவ்விஷயம் குறித்து தனது அதிருப்தியை வெளிப்படுத்தியுள்ளார். இதுகுறித்து அவர் அளித்த பேட்டி வருமாறு:

பெண்களை வெறும் கவர்ச்சிப் பொருளாக சித்தரிப்பது தென்னிந்திய சினிமாவில் மட்டுமல்ல, வட இந்தியாவிலும் அதிகமாக நடந்து வருகிறது. ஒரு காட்சியில் எல்லை மீறுவது போல் தெரிந்தாலோ அல்லது விரசமாக தோன்றினாலோ, உடனே நான் அதில் நடிக்க மறுத்துவிடுவேன். இது முழுக்க, முழுக்க சம்பந்தப்பட்ட நடிகர், நடிகைகளின் தனிப்பட்ட விருப்பத்தை பொறுத்தது. ஒவ்வொருவருக்கும் ஒரு எல்லை இருக்கிறது. நடிகைகள் தங்களின் சுயமரியாதையை விட்டுக்கொடுக்காமல் துணிச்சலாக முடிவெடுக்க வேண்டும்.