சென்னை: மனைவி ஆர்த்தியை பிரிவதாக நடிகர் ஜெயம் ரவி அறிவித்துள்ளார். ஜெயம் ரவி, அவரது மனைவி ஆர்த்தி இடையே கருத்து வேறுபாடு ஏற்பட்டுள்ளதாகவும் அவர்கள் பிரிய முடிவு செய்திருப்பதாகவும் சில தினங்களுக்கு முன் தகவல் வெளியானது. இந்நிலையில் தன்னை சார்ந்தவர்களின் நலனுக்காக மனைவியை பிரிவதாக ஜெயம் ரவி தெரிவித்துள்ளார். இது குறித்து ஜெயம் ரவி நேற்று வெளியிட்ட அறிக்கை: வாழ்க்கை என்பது பல்வேறு அத்தியாயங்கள் கொண்ட ஒரு பயணம். ஒவ்வொன்றும் அதன் சொந்த சவால்கள் மற்றும் வாய்ப்புகளுடன் வருகிறது. என்னுடைய பயணத்தில் அனைவரிடத்திலும் நேர்மையாகவும் வெளிப்படையாகவும் இருக்க முயற்சி செய்து வருகிறேன். எனவே மிகவும் நெஞ்சம் கசந்த ஒரு தனிப்பட்ட செய்தியை உங்களுடன் பகிர வேண்டிய கட்டாயத்தில் இருக்கிறேன்.
நீண்டகால யோசனை மற்றும் பல பரிசீலனைக்கு பிறகு ஆர்த்தி உடனான எனது திருமண வாழ்வில் இருந்து விலகுவது என்ற கடினமான ஒரு முடிவை எடுத்துள்ளேன். இந்த முடிவு எளிதாக எடுக்கப்பட்டதல்ல. என்னை சார்ந்தவர்களின் நலனை கருத்தில் கொண்டும் அவர்களின் நல்வாழ்வுக்காக எடுக்கப்பட்டது. இந்த நேரத்தில் எனது தனியுரிமையையும் எனக்கு நெருக்கமானவர்களின் தனியுரிமைகளுக்கும் மதிப்பளிக்கும்படி அனைவரையும் கேட்டுக்கொள்கிறேன். இந்த முடிவு எனது சொந்த முடிவாகும். இது எனது தனிப்பட்ட விஷயமாக இருக்க வேண்டும் என வேண்டிக்கொள்கிறேன். என்னுடைய முன்னுரிமை எப்போதும் எனது நடிப்பு மூலம் எனது ரசிகர்கள் மற்றும் மக்களுக்கு மகிழ்ச்சி மற்றும் பொழுதுபோக்கு அளிக்க வேண்டும் என்பதே. நான் என்றும் எப்போதும் உங்கள் ஜெயம் ரவியாகவே இருக்க விரும்புகிறேன். நீங்கள் எனக்கு அளிக்கும் ஆதரவை நன்றியுடன் உணர்கிறேன். இவ்வாறு ஜெயம் ரவி கூறியுள்ளார்.
