Sun network Logo Epaper LogoEpaper Facebook
search-icon-img

வெப்சீரிஸ்களில் நடிக்கும் நடிகர்களுக்கு சம்பளம் குறைவா? சினிமா வட்டாரத்தில் பரபரப்பு விவாதம்

சென்னை: தமிழ் சினிமாவில் தரப்படும் சம்பளம் போல், ஓடிடியில் நடிகர்கள், நடிகைகளுக்கு வழங்கப்படுவதில்லை என புகார் எழுந்துள்ளது.தமிழ் சினிமா நடிகர்கள் மற்றும் தயாரிப்பாளர்கள் மத்தியில் தற்போது விவாதிக்கப்படும் மிக முக்கியமான உண்மை இது. ஓடிடி வெப்சீரிஸ்களில் நடிக்கும் போது வேலை நேரம் மற்றும் உழைப்பு அதிகம், ஆனால் அதற்கேற்ற ஊதியம் இல்லை என்ற புகார் சினிமா வட்டாரத்தில் பரவலாக உள்ளது. இதில் உள்ள நிஜமான திரைமறைவு உண்மைகள், தயாரிப்பு கணக்குகள் மற்றும் சாதக பாதகங்கள் பற்றி பார்க்கலாம். திரையரங்குப் படம் பொதுவாக 2 முதல் 2.5 மணி நேரம் ஓடும்.

இதற்கு 40 முதல் 60 நாட்கள் வரை படப்பிடிப்பு நடக்கும். ஒரு சீரீஸ் பொதுவாக 6 முதல் 8 எபிசோடுகள் கொண்டதாக இருக்கும். மொத்த ஓட்ட நேரம் 4 முதல் 6 மணி நேரம் வரை இருக்கும். இதற்கு 70 முதல் 90 நாட்கள் வரை படப்பிடிப்பு தேவைப்படும். நடிகர்கள் ஒரு படத்திற்கு கொடுக்கும் கால்ஷீட்டை விட, வெப்சீரிஸிற்கு கிட்டத்தட்ட ஒன்றரை மடங்கு அதிக நாட்கள் உழைக்க வேண்டியுள்ளது. ஆனால், சம்பளம் ஒரு படத்திற்கு இணையானதாகவோ அல்லது அதைவிடக் குறைவாகவோதான் தரப்படுகிறது என்பது உண்மைதான்.

ஒரு சீரீஸ் தயாரிக்க ரூ.15 கோடி முதல் ரூ.25 கோடி வரை பட்ஜெட் ஒதுக்கப்படுகிறது என்றால், அதில் 50%-க்கும் மேல் நடிகர்களின் சம்பளத்திற்கே கொடுத்துவிட்டால், தரமான காட்சிகளைஎடுக்க முடியாது என ஓடிடி நிறுவனங்கள் கருதுகின்றன. திரையரங்குகளில் படம் ஓடினால் நூறு கோடி, இருநூறு கோடி என பாக்ஸ் ஆபீஸ் வசூல் வரும். ஆனால் வெப்சீரிஸ் என்பது சந்தா அடிப்படையில் மட்டுமே இயங்குகிறது.

இதனால் ஓடிடி நிறுவனங்கள் நடிகர்களுக்கு ஒரு குறிப்பிட்ட எல்லைக்கு மேல் சம்பளம் தர விரும்புவதில்லை. சம்பளப் புகார் இருந்தாலும், முன்னணி நடிகர்கள் வெப்சீரிஸ் பக்கம் வர சில முக்கிய காரணங்கள் உள்ளன. 2 மணி நேரப் படத்தில் ஹீரோயிசம், பாடல்கள், சண்டைக்காட்சிகளுக்கு முக்கியத்துவம் தர வேண்டும். ஆனால், 5 மணி நேர வெப்சீரிஸில் நடிகர்களின் நடிப்புத் திறமையை வெளிப்படுத்த பெரிய வாய்ப்பு கிடைக்கிறது. ஓடிடி தளங்கள் மூலம் உலகம் முழுவதும் உள்ள 190-க்கும் மேற்பட்ட நாடுகளின் பார்வையாளர்களை ஒரே நேரத்தில் சென்றடைய முடிகிறது.

சீசன் 1 ஹிட்டானால், சீசன் 2, சீசன் 3 என அடுத்தடுத்த பாகங்களில் நடிக்கும்போது அவர்களின் மார்க்கெட் மதிப்பு பல மடங்கு உயர்கிறது. நடிகர்களின் புகார் நியாயமானதுதான். உழைப்பு மற்றும் நேரத்தின் அடிப்படையில் பார்த்தால் வெப்சீரிஸுக்கு கூடுதல் சம்பளம் தரப்பட வேண்டும். ஆனால், ஓடிடி சந்தையின் வருவாய் வரம்பு காரணமாக, தியேட்டர் படங்களின் சம்பளமே இங்கும் நிர்ணயிக்கப்படுகிறது. இதனால் பல நடிகர்கள் தற்போது நாட்களின் அடிப்படையில் (Per Day Salary) அல்லது எபிசோட் அடிப்படையில் (Per Episode Salary) சம்பளம் பேசத் தொடங்கியுள்ளனர்.