சென்னை: மலையாள நடிகை அமலா பால், தமிழில் பிரபு சாலமன் இயக்கிய ‘மைனா’ என்ற படத்தின் மூலம் தமிழ் ரசிகர்கள் மத்தியில் பிரபலமானார். தொடர்ந்து பல்வேறு மொழிகளில் முன்னணி ஹீரோக்களுடன் இணைந்து நடித்த அவர், பிறகு இயக்குனர் ஏ.எல்.விஜய்யை காதல் திருமணம் செய்தார். ஆனால், கருத்து வேறுபாடு காரணமாக அவரை விவாகரத்து செய்துவிட்டு பிரிந்தார். இதையடுத்து ஜகத் தேசாய் என்பவரை காதலித்து 2வது திருமணம் செய்துள்ள அமலா பாலுக்கு இலை என்ற மகன் இருக்கிறான். இந்த நிலையில், சாமி இயக்கிய ‘சிந்து சமவெளி’ என்ற படத்தில் நடித்தது குறித்து அவர் வேதனையுடன் சொன்ன கருத்து வைரலாகி வருகிறது.

இதுகுறித்து அமலா பால் கூறுகையில், ‘உண்மையிலேயே நான் ‘சிந்து சமவெளி’ என்ற படத்தில் நடித்து, பெரிய தவறு செய்துவிட்டேன். அப்போது எனக்கு 17 வயது. இனி ஒருபோதும் அந்த மாதிரி கேரக்டரில் நடிக்கக்கூடாது என்று முடிவு செய்திருக்கிறேன். அப்படத்தில் நடித்து முடித்த பிறகு நான் மிகவும் பயந்தேன். காரணம், அதற்கு பல்வேறு தரப்பினர் மத்தியில் இருந்து எதிர்மறை கருத்துகள் வந்தன. நான் கடுமையாக விமர்சிக்கப்பட்டேன். அப்படத்தை பார்த்த பிறகு என் தந்தை சோகமாக இருந்தார். அப்படம் என் தனிப்பட்ட வாழ்க்கையை பாதித்தது’ என்றார்.