வரும் ஆகஸ்ட் 25ம் தேதி, மறைந்த விஜயகாந்தின் பிறந்தநாள். இதை முன்னிட்டு ‘கேப்டன் பிரபாகரன்’ படம் மீண்டும் திரைக்கு கொண்டு வரப்படுகிறது. அதிநவீன தொழில்நுட்பத்தில் புதுப்பிக்கப்பட்டுள்ள இப்படம், ஸ்பேரோ சினிமாஸ் சார்பில் வரும் ஆகஸ்ட் 22ம் தேதி கார்த்திக் வெங்கடேசன் மூலம் வெளியிடப்படுகிறது. விஜயகாந்த் நடித்து வெற்றிபெற்ற 100வது படமான ‘கேப்டன் பிரபாகரன்’, கடந்த 1991 ஏப்ரல் 14ம் தேதி தமிழ்ப் புத்தாண்டு அன்று வெளியானது. ஆர்.கே.செல்வமணி இயக்கினார். இப்படத்துக்கு பிறகே விஜயகாந்துக்கு ‘கேப்டன்’ என்ற அடைமொழி கிடைத்தது.

முக்கிய வேடங்களில் சரத்குமார், ரூபிணி, ரம்யா கிருஷ்ணன், மன்சூர் அலிகான், லிவிங்ஸ்டன், காந்திமதி நடித்திருந்தனர். இளையராஜா இசை அமைத்தார். இப்படத்தின் ரிலீஸ் தேதி அறிவிப்பு நிகழ்ச்சியில் தேமுதிக தலைவர் பிரேமலதா விஜயகாந்த், பொருளாளர் எல்.கே.சுதீஷ், இயக்குனர்கள் விக்ரமன், ஆர்.வி.உதயகுமார், ஆர்.அரவிந்தராஜ், பேரரசு, ஆர்.கே.செல்வமணி கலந்துகொண்டனர். 34 வருடங்களுக்கு பிறகு இப்படம் மீண்டும் ரிலீசாவதை விஜயகாந்த் ரசிகர்கள் ஆவலுடன் எதிர்பார்த்து காத்திருக்கின்றனர்.