பட்டிமன்ற பேச்சாளர் திண்டுக்கல் ஐ.லியோனியின் மகன் லியோ சிவகுமார், காயத்ரி ரெமா நடித்துள்ள படம், ‘மாண்புமிகு பறை’. சுபா, சுரேஷ் ராம் திரைக்கதை எழுதியுள்ளனர். விஜய் சுகுமார் இயக்கியுள்ளார். தேவா இசை அமைத்துள்ளார். கடந்த மே மாதம் நடந்த கேன்ஸ் திரைப்பட விழாவில் திரையிடப்பட்டு பலரது கவனத்தை ஈர்த்த இப்படம், வரும் டிசம்பர் 12ம் தேதி திரைக்கு வருகிறது. இப்படம் சம்பந்தமான நிகழ்ச்சியில் பேசிய கே.பாக்யராஜ், ‘சினிமா வாய்ப்பு தேடி நான் சென்னைக்கு வந்தபோது ஒருவர், ‘என்ன கஷ்டம் வந்தாலும் சரி. எவ்வளவு பசியாக இருந்தாலும் சரி. தயவுசெய்து ஓட்டலில் சர்வர் வேலைக்கு மட்டும் போய்விடாதே’ என்று அட்வைஸ் செய்தார். ஏன் அப்படி சொன்னார் என்று அப்போது எனக்கு புரியவில்லை.

சினிமாவில் வாய்ப்பு கிடைப்பதற்கு முன்பு தமிழ்நாடு மற்றும் ஆந்திரா பகுதிகளில் ஊரை சுற்றினேன். அப்போது பசி பொறுக்க முடியாமல் ஒரு ஓட்டலுக்கு சென்று சர்வர் வேலை கேட்டேன். அந்த ஓனர், ‘முதலில் போய் வயிறார சாப்பிடு. அப்புறம் வேலை பார்க்கலாம்’ என்று சொன்னார். அப்படி சாப்பிட்டு வந்தவுடன் இரண்டு ரூபாய் கொடுத்தார். `இதை வைத்துக்கொண்டு, எந்த ஊருக்கு செல்ல வேண்டுமோ அங்கே போய்விடு’ என்றார். சினிமாவில் சாதிக்க வேண்டும் என்ற லட்சியத்துடன் வந்த நான், மீண்டும் ஊருக்கு செல்ல விரும்பவில்லை.

அந்த ஓட்டலிலேயே வேலை பார்ப்பதாக சொன்னேன். ‘நீ நினைப்பது போல் இது சாதாரண வேலை இல்லை’ என்றார். எந்த வேலைக்கு என்னை போக வேண்டாம் என்று சொன்னார்களோ, அந்த வேலைக்கு நான் தகுதி இல்லை என்று அப்போதுதான் புரிந்துகொண்டேன்’ என்றார்.