நடிகர் எம்.ஆர்.ராதாவின் முகத்தை கொண்ட மாஸ்க் அணிந்த ஒரு கொள்ளை கூட்டம், சென்னை சூப்பர் மார்க்கெட்டில் பதுக்கி வைக்கப்பட்ட 446 கோடி ரூபாயை கொள்ளையடிக்கிறது. பணம் சேர்ப்பதை மட்டுமே குறிக்கோளாக கொண்ட தனியார் டிடெக்டிவ் கவின், வெளிநாட்டில் குடியேறும் கனவில் மிதக்கும் என்ஜிஓ ஆண்ட்ரியா ஜெரிமியா, தனியாக தேர்தலில் நின்று ஜெயிக்க துடிக்கும் பவன் ஆகியோர், இந்த மாபெரும் கொள்ளையில் எப்படி சம்பந்தப்படுகிறார்கள்? கொள்ளையடித்தது யார் என்பது அதிர்ச்சியூட்டும் மீதி கதை. பணத்துக்காக படுபாதக செயலில் ஈடுபட்டாலும், நெஞ்சில் ஈரம் கசியும் குணத்துடன் வரும் கவின் சிறப்பாக நடித்துள்ளார். அவருக்கும், ஆண்ட்ரியா ஜெரிமியாவுக்குமான ஆடுபுலி ஆட்டம் செம ஜோர்.

வஞ்சகத்துடன் வலம் வரும் ஆண்ட்ரியா ஜெரிமியாவுக்கு இது ஒரு திருப்புமுனை படம். அரசியல்வாதியாகவே மாறியிருக்கும் பவன், இறுதியில் கதையின் போக்கை மாற்றும் அப்பாவி சார்லி, பவர்ஃபுல் பேட்டரி கேரக்டரில் வெங்கட் செங்குட்டுவன் ஆகியோர் சிறப்பாக நடித்துள்ளனர். கவின் காதலியாக ருஹானி ஷர்மா மற்றும் ‘கல்லூரி’ வினோத், அச்யுத் குமார், ரமேஷ் திலக், சுப்பிரமணியம் சிவா, அர்ச்சனா சந்தோக், ஜார்ஜ் மரியன், ரெடின் கிங்ஸ்லி, தக்‌ஷா பிள்ளை ஆகியோர் இயல்பாக நடித்துள்ளனர். ஆர்.டி.ராஜசேகரின் ஒளிப்பதிவு காட்சிகளை விறுவிறுப்பாக நகர்த்துகிறது. ஜி.வி.பிரகாஷ் குமார் இசையில் பாடல்கள் ஈர்க்கின்றன. பின்னணி இசையில் கூடுதல் பலம் சேர்த்துள்ளார். கலை இயக்குனர்கள் ஜாக்கி, எம்.விஜய் அய்யப்பன், எடிட்டர் ஆர்.ராமர் ஆகியோரின் பணி பாராட்டுக்குரியது. லாஜிக் மீறல்கள் இருந்தாலும், விறுவிறுப்பான படம் தந்த இயக்குனர் விகர்ணன் அசோக்கை பாராட்டி வரவேற்கலாம்.