இந்திய திரையுலகில் முன்னணி நடிகைகளில் ஒருவராக இருப்பவர், மிருணாள் தாக்கூர். துல்கர் சல்மானுடன் அவர் நடித்த ‘சீதா ராமம்’ என்ற பான் இந்தியா படம் வெற்றிபெற்றதை தொடர்ந்து, அவரை பல முன்னணி நடிகர்கள் தங்கள் படத்தில் நடிக்க வைக்க கால்ஷீட் கேட்கின்றனர். இதனால் தனது சம்பளத்தை கோடிகளில் உயர்த்தியுள்ள மிருணாள் தாக்கூர், டோலிவுட் மற்றும் பாலிவுட்டில் அதிக கவனம் செலுத்தி வருகிறார். தமிழில் அவர் கேட்கும் சம்பளத்தை அறிந்த சில தயாரிப்பாளர்கள் தலைதெறிக்க ஓடினர். வாழ்க்கையில் உச்சத்துக்கு சென்ற அனைவரும் தங்களது முந்தைய வாழ்க்கையில் கண்டிப்பாக பல்வேறு அவமானங்களை சந்தித்திருப்பார்கள்.

அது குடும்பத்தினர் மூலமாகவோ அல்லது பணியாற்றும் இடத்திலோ, பொது இடங்களிலோ நடந்திருக்கலாம். மிருணாள் தாக்கூரும் உறவினர்களால் அவமானப்படுத்தப்பட்டது குறித்து வெளிப்படையாக பேசியுள்ளார். அவர் கூறுகையில், ‘எனது உறவினர்களில் சிலர், அவர்களது காரில் என் அம்மாவை ஏற்ற மறுத்தார்கள். அன்று நான் ஒரு முடிவு செய்தேன், சொந்தமாக கார் வாங்க வேண்டும் என்று. இன்று நான் பென்ஸ் கார் வாங்கியிருக்கிறேன். எங்கள் குடும்பத்தில் இந்த கார் வைத்துள்ளது நான் மட்டும்தான்’ என்றார். இதை சொல்லும்போது அவரது குரல் தழுதழுத்தது. உடனே சில நெட்டிசன்கள், ‘உங்கள் லட்சியத்தில் சாதித்துவிட்டீர்கள். உறவினர்கள் சொல்வதை பற்றி எல்லாம் கவலைப்பட வேண்டாம். மேலும், மேலும் முன்னேறிக்கொண்டே இருங்கள்’ என்று பதிவிட்டுள்ளனர்.