‘கிரைம் நாவல் கிங்’ ராஜேஷ்குமாரின் ‘உலகை விலை கேள்’ என்ற நாவலை தழுவி உருவாக்கப்பட்டுள்ள வெப்சீரிஸ், ‘ரேகை’. வெளிநாட்டில் தடை செய்யப்பட்ட குறிப்பிட்ட மருந்தை இந்தியாவுக்கு இறக்குமதி செய்யும் ஒரு கும்பல், 5 பேரை தேர்வு செய்து, அவர்கள் உடலில் மருந்தை செலுத்தி பரிசோதனை செய்கின்றனர். அதில் ஏற்பட்ட சிக்கல் காரணமாக ஒருவர் மரணம் அடைகிறார். அது தற்கொலை என்று ஜோடிக்கப்பட்ட வழக்கை பாலா ஹாசன் விசாரிக்கும்போது மர்மங்கள் வெளிப்படுகிறது.

அதிரடி சஸ்பென்ஸ் கிரைம் திரில்லரை ஜெட் வேகத்தில் கொண்டு சென்றுள்ள இயக்குனர் எம்.தினகரனுக்கு பாராட்டு. போலீஸ் அதிகாரிக்கான மிடுக்குடன் வரும் பாலா ஹாசன், கொலையாளியை நெருங்கும்போது ஏற்படும் பதற்றத்தை கச்சிதமாக வெளிப்படுத்தியுள்ளார். அவரது காதலியாக வரும் போலீஸ் கான்ஸ்டபிள் பவித்ரா ஜனனி, இயல்பான நடிப்பில் அசத்தியுள்ளார். அஞ்சலி ராவ் வில்லி என்று நினைத்தால், பிரேத பரிசோதனை மருத்துவர்

வினோதினி வைத்தியநாதன் செய்யும் செயல்கள், அதைவிட பயங்கரமாக இருக்கிறது. இருவரும் மிகவும் நேர்த்தியாக நடித்துள்ளனர்.

ஒளிப்பதிவை மகேந்திரா எம்.ஹென்றி சிறப்பாக செய்துள்ளார். பின்னணி இசையை ஆர்.எஸ்.ராஜ் பிரதாப் கச்சிதமாக வழங்கியுள்ளார். கலை இயக்குனர் அமைத்த மார்ச்சுவரி செட் பயத்தை ஏற்படுத்துகிறது. முந்தைய மெடிக்கல் கிரைம் சப்ஜெக்ட்டுகள் ஏற்படுத்திய தாக்கத்தை இத்தொடர் ஏற்படுத்தியுள்ளதும், அடுத்ததை எளிதில் கணிக்க முடியாத வேகமும், இயக்குனர் தினகரனை யார் என்று கேட்க வைக்கிறது. 7 எபிசோடுகள் கொண்ட இது, நாளை முதல் ஜீ5 ஓடிடி தளத்தில் ஒளிபரப்பாகிறது.