சர்ச்சைக்குரிய ‘ஹால்’ படம் நீதிபதிக்கு திரையிடல்
மலையாளத்தில் ஷேன் நிகாம், சாக் ஷி வைத்யா நடித்துள்ள ‘ஹால்’ என்ற படத்தை வீரா எழுதி இயக்கியுள்ளார். இஸ்லாமிய இளைஞனுக்கும், கிறிஸ்தவ பெண்ணுக்குமான காதலை சொல்லும் இப்படம், கடந்த செப்டம்பர் 12ம் தேதி மலையாளம், தமிழ், இந்தி, தெலுங்கு, கன்னடம் ஆகிய மொழிகளில் திரைக்கு வரும் என்று அறிவிக்கப்பட்டது. ஆனால், படத்தில் இடம்பெறும் மாட்டிறைச்சி பிரியாணி காட்சி மற்றும் 15 வசன காட்சிகளை நீக்க வேண்டும் என்று சென்சார் போர்டு உத்தரவிட்டது. இதற்கு படக்குழு மறுத்ததால் சான்றிதழ் வழங்கப்படவில்லை. இதை எதிர்த்து ‘ஹால்’ படக்குழு கேரள உயர் நீதிமன்றத்தில் ஒரு வழக்கு தொடர்ந்தது.
அதோடு, ‘ஹால்’ படத்தை நீதிமன்றமோ அல்லது அவர்கள் நியமிக்கும் பிரதிநிதியோ பார்க்க வேண்டும் என்ற கோரிக்கையும் விடுக்கப்பட்டது. இந்நிலையில், படத்தில் ஆட்சேபத்துக்குரிய கருத்துகள் இருப்பதாக சொல்லி, கேரள மாநில கத்தோலிக்க காங்கிரசின் தாமரைசேரி மறைமாவட்ட தலைவர் கே.சாக்கோ மனு தாக்கல் செய்தார். அதில், சமூக மற்றும் வகுப்புவாத நல்லிணக்கத்துக்கு அச்சுறுத்தலாக இப்படத்தின் காட்சிகள் இருப்பதாக சொல்லியிருந்தார். இத்தகைய காட்சிகள் அனுமதிக்கப்பட்டு படம் வெளியானால், அது கிறிஸ்தவ சமூகத்தின் மத உணர்வுகளை புண்படுத்தும் என்றும், அமைதி மற்றும் நல்லிணக்கத்தை சீர்குலைக்கும் என்றும் அந்த மனுவில் கூறியிருந்தார்.
வழக்கை விசாரித்த நீதிபதி வி.ஜி.அருண், படத்தை பார்க்க வேண்டும் என்ற தயாரிப்பாளரின் கோரிக்கையை கடந்த 21ம் தேதி நீதிமன்றம் பரிசீலிக்கும் என்று சொல்லியிருந்தார். அதன்படி இந்த வழக்கு நேற்று முன்தினம் விசாரணைக்கு வந்தது. அப்போது, நாளை (25ம் தேதி) மாலை 7 மணியளவில், காக்கநாட்டிலுள்ள தியேட்டரில் படத்தை பார்ப்பதாக நீதிபதி தெரிவித்தார். அப்போது சென்சார் போர்டு அதிகாரிகள், கே.சாக்கோ ஆகியோரும் உடனிருக்க வேண்டும் என்று அறிவுறுத்தினார்.
பிராந்திய செய்திகள்
