கடந்த 2016ல் மலையாளத்தில் வெளியான ‘ஹேப்பி வெட்டிங்’ என்ற படத்தில் அறிமுகமானவர், கிரேஸ் ஆண்டனி. பிறகு 2019ல் வெளியான ‘கும்பளங்கி நைட்ஸ்’ என்ற படத்தில் ஏற்றிருந்த சிம்மி என்ற கேரக்டரின் மூலம் பலரது கவனத்தை ஈர்த்த அவர், தொடர்ந்து ‘ரோர்சாச்’, ‘தமாஷா’,’அப்பன்’ உள்பட பல படங்களில் நடித்தார். தமிழில் 2022ல் வெளியான ‘சதுரங்க வேட்டை 2’ படத்தில் நடித்திருந்தார். பிறகு ராம் இயக்கத்தில் மிர்ச்சி சிவா நடித்து வெளியான ‘பறந்து போ’ என்ற படத்தில் ஹீரோயினாக நடித்தார். வெப்தொடர்கள், குறும்படங்கள், விளம்பரங்கள் என்று பிசியாக இருக்கும் அவர், மோகன்லால் நடிப்பில் வெளியான ‘மலைக்கோட்டை வாலிபன்’ என்ற படத்தில், பாலிவுட் நடிகை சோனாலி குல்கர்னிக்கு மலையாளத்தில் டப்பிங் பேசியிருந்தார். இந்நிலையில், நேற்று முன்தினம் கிரேஸ் ஆண்டனிக்கு திருமணம் நடந்துள்ளது. இதை அவர் தனது இன்ஸ்டாகிராமில் பதிவிட்டுள்ளார். ஆனால், தனது கணவரின் முகத்தையோ, பெயரையோ அவர் பதிவிடவில்லை. திடீர் திருமணம் செய்த கிரேஸ் ஆண்டனிக்கு ரசிகர்கள் வாழ்த்து தெரிவித்துள்ளனர்.