தமிழ் முன்னணி ஹீரோ அஜித் குமார், கார் மற்றும் பைக் ரேஸில் அதிக கவனம் செலுத்தி வருகிறார். சமீபத்தில் அவர் அளித்துள்ள பேட்டியில், ‘போட்டியை முடிக்கும் வரை அல்லது ஒரு மோசமான விபத்தை சந்திக்கும் வரை, நாம் எவ்வளவு வேகத்தில் செல்கிறோம் என்பதை உணர முடியாது. எப்படியாவது இலக்கை அடைய வேண்டும் என்பதில் மட்டுமே கவனம் செலுத்துவோம். துபாய் 24H ரேஸிற்கு முன்பு ஒரு விபத்தை நான் சந்தித்தபோது, பலர் பல்வேறு கருத்துகளை தெரிவித்தனர். ஆனால், எந்தவொரு அணி மற்றும் ரேஸரிடம் கேட்டாலும், ‘இதுபோன்ற விபத்துகள் மோட்டார் ஸ்போர்ட்டின் ஒரு அங்கம்’ என்று ஒப்புக்கொள்வார்கள்.

ஒரு காரை வடிவமைக்கும்போது, ரேஸரின் பாதுகாப்புக்கு அதிக முக்கியத்துவம் அளிக்கப்படுகிறது. உயிரிழப்பு ஏற்படுவது மிகவும் அரிது. எனினும், நீங்கள் காரின் வரம்புகளையும், உங்களின் வரம்புகளையும் தாண்டி செல்ல முயற்சிக்கும்போது சில விபத்துகளும், மோதல்களும் நடப்பது இயல்பு. சினிமா படப்பிடிப்புகளில் கூட எனக்கு சில விபத்துகள் ஏற்பட்டுள்ளது. அதற்காக பல அறுவை சிகிச்சைகளும் மேற்கொண்டு இருக்கிறேன். அந்த சில விபத்துகளும், காயங்களும் சினிமாவில் இருந்து என்னை தடுக்கவில்லை. ‘உங்களுக்கு காயம் ஏற்படுகிறது. அதனால் படங்களில் நடிக்காதீர்கள்’ என்று எந்த ரசிகரும் என்னிடம் சொன்னது இல்லை. அப்படி என்றால் விபத்துகளும், காயங்களும் மோட்டார் ஸ்போர்ட்டை ஏன் தடுக்க வேண்டும்?’ என்று பேசியுள்ளார்.