படகு பயணத்தில் மாறிய வாழ்க்கை: தொழிலாளிக்கு உதவிய விஜய் சேதுபதி

சென்னை: ஒரு சில நடிகர்கள் செய்யும் உதவிகள் வெளியே தெரிவதில்லை. அப்படி வெளியே வரமால் இருந்து தற்போது வெளிவந்துள்ள செய்தி தான் விஜய் சேதுபதி செய்த உதவி பற்றியது. அதாவது, விஜய் சேதுபதி, படகில் சென்று கொண்டிருக்கும்போதே பரிசல் ஓட்டும் தொழிலாளிக்கு ரூ.50,000யை தூக்கி கொடுத்து முதலாளியாக மாற்றியுள்ளார். இது குறித்து, கேரளாவில் படகு ஓட்டும் தொழிலாளி கூறியதாவது, “மிகப்பெரிய ஸ்டார் நடிகர்கள் உட்பட பல முன்னணி நடிகர்கள் குறிப்பிட்ட வீட்டுக்கு ஷூட்டிங்க்கு வந்திருக்காங்க. நான்தான் அவங்களை ஏரியைக் கடந்து செல்ல ஒரு படகில் அந்த வீட்டுக்கு கூட்டிட்டு போவேன். அவங்க எல்லாரும் திரும்பி போறப்போ எனக்கு ஏதாவது தருவேன்னு சொல்லுவாங்க. அதேபோல எதாவது தந்தவங்களும் இருக்காங்க. கண்டுக்காமலே போனவங்களும் இருக்காங்க. தமிழ் நடிகர் விஜய் சேதுபதி ஒரு தடவை ஷூட்டிங்க்கு வந்திருந்தாங்க.

ஷூட் முடிஞ்சு, நான் அவரை ஒரு படகில் அக்கரைக்கு கூட்டிட்டுப் போயிட்டுருக்கிறப்போ, இந்தப் படகு உங்களுடையதான்னு கேட்டார். இல்லை, இது வாடகைக்கு ஓட்டுறேன். ஒரு நாளைக்கு இவ்வளவு வாடகை கொடுக்கணும்னு சொன்னப்போ, இதை சொந்தமா வாங்க எவ்வளவு செலவாகும்? என்று கேட்டார். அதுக்கு ஐம்பதாயிரம் ரூபாய் வரைக்கும் செலவாகுமுன்னு சொன்னேன். அப்போ அங்க, படகில வச்சே 50,000 ரூபாய்க்கு ஒரு காசோலை எழுதி என்கிட்ட கொடுத்தார். இனி சொந்த படகை ஓட்டுங்கன்னு சொன்னாரு. கஷ்டப்பட்டு ஜெயிச்சவங்களுக்கு தான் வாழ்க்கையின் வலி தெரியும்”. இவ்வாறு அந்த தொழிலாளி கூறியிருக்கிறார். அவரது இந்த பேட்டி சமூக வலைத்தளங்களில் வைரலாகி வருகிறது.