உடல் எடையால் கதறியழுத கிரேஸ் ஆண்டனி

மலையாளத்தில் ‘ஹேப்பி வெட்டிங்’, ‘கும்பளங்கி நைட்ஸ்’, ‘தமாஷா’, ‘அப்பன்’ உள்பட பல படங்களில் நடித்தவர், கிரேஸ் ஆண்டனி. தமிழில் ‘சதுரங்க வேட்டை 2’, ‘பறந்து போ’ ஆகிய படங்களில் நடித்தார். சமீபத்தில் அவருக்கு திருமணம் நடந்தது. தொடர்ந்து சினிமாவில் நடித்து வரும் அவர் கூறுகையில், ‘கடந்த 8 மாதங்களில் 15 கிலோ வரை என் உடல் எடையை குறைத்தேன். 80 கிலோவில் இருந்து 65 கிலோ வரை குறைத்துள்ளேன். உடல் எடையை குறைத்த இப்பயணம் எளிதாக இல்லை. மிகப்பெரிய போராட்டமாக இருந்தது. பல நாட்கள் நான் கதறியழுதேன். என்னை பற்றி எனக்கே பல சந்தேகங்கள் ஏற்பட்டன.

என்னால் இதை சரியாக நிறைவேற்ற முடியுமா என்பது போன்ற கேள்விகள் எழுந்தன. ஆனால், அந்த போராட்டங்களின் மூலமாக என் வலிமை என்ன என்பதை அறிந்து ஆச்சரியப்பட்டேன். எவ்வளவு சோர்வடைந்தாலும் என் தன்னம்பிக்கையை கைவிடவில்லை. என்னை சரியாக வழிநடத்திய பயிற்சியாளருக்கு நன்றி. இந்த மாற்றம் ஒரு போட்டோவில் மட்டுல்ல. நீங்களும் முயற்சி செய்கிறீர்கள் என்றால், தொடர்ந்து கடுமையாக முயற்சி செய்யுங்கள். ஒருநாள் திரும்பி பார்த்தால், ஒவ்வொரு கண்ணீர் துளிக்கும், ஒவ்வொரு சந்தேகத்துக்கும், ஒவ்வொரு முயற்சிக்கும் மதிப்பு இருப்பது உங்களுக்கே தெரியும்’ என்றார்.