சிறுவனை வியக்க வைத்த தேவா

திரைப்பட பாடல்களுக்கான காப்புரிமை தொடர்பான விவாதங்கள் நடந்து வரும் நிலையில், இசை அமைப்பாளர் மற்றும் பாடகர் தேவாவிடம், `நீங்கள் இசை அமைத்த பாடல்களுக்கு ஏன் காப்புரிமை கேட்பது இல்லை?’ என்று கேட்கப்பட்டது. இதற்கு பதிலளித்த தேவா, `நான் எப்போதுமே காப்புரிமை கேட்டது இல்லை. அப்படியே நான் கேட்டாலும், அது எங்கேயோ சென்றுதான் முடிகிறது. நான் காப்புரிமை கேட்கக்கூடாது என்று முடிவு செய்ததற்கு காரணம் இருக்கிறது. கடந்த 1990களில் நான் இசை அமைத்த பல பாடல்கள் இப்போது வைரலாகின்றன. 1992ல் இசை அமைத்த ‘கரு கரு கருப்பாயி’ என்ற பாடல், மீண்டும் ஒரு படத்தில் பயன்படுத்தப்பட்டு வைரலானது.

சமீபத்தில் ஒரு மாலுக்கு சென்றிருந்தேன். அப்போது ஒரு சிறுவன் தனது தந்தையுடன் வந்திருந்தான். அந்த தந்தை என்னை காண்பித்து, `உனக்கு மிகவும் பிடித்த ‘கரு கரு கருப்பாயி’ என்ற பாடலுக்கு இசை அமைத்தவர் இவர்தான்’ என்று என்னை அறிமுகப்படுத்தினார். உடனே சிறுவன் ஆச்சரியப்பட்டு, ‘சூப்பர் அங்கிள்’ என்று கைகொடுத்தான். ‘நான் அங்கிள் இல்லடா... தாத்தா’ என்று சொல்லி அவனிடம் பேசினேன். நான் எப்போதோ இசை அமைத்த ஒரு பாடல் இந்த தலைமுறைக்கும் பிடித்துள்ளது. அதற்கு நான்தான் இசை அமைப்பாளர் என்ற விஷயமும் தெரிகிறது. இந்த திருப்தியே எனக்கு போதும். அதனால்தான் நான் காப்புரிமை கேட்பது இல்லை’ என்றார்.