இயக்குனரை சாடிய திவ்யபாரதிக்கு பெருகும் ஆதரவு
தமிழ் மற்றும் தெலுங்கில் நடித்து வரும் திவ்யபாரதி, தற்போது நரேஷ் குப்பிலி இயக்கும் ‘கோட்’ என்ற தெலுங்கு படத்தில் நடிக்கிறார். இப்படத்தின் ஷூட்டிங் ஸ்பாட்டில், இயக்குனர் தன்னை பலமுறை அவமானப்படுத்தியதாக சில நாட்களுக்கு முன்பு குற்றம் சாட்டியிருந்தார். மேலும், நரேஷ் குப்பிலியின் எக்ஸ் தளத்தை டேக் செய்திருந்த திவ்யபாரதி, ‘பெண்களை ‘சிலகா’ (பறவை) போன்ற வார்த்தைகளால் அழைப்பது நகைச்சுவை அல்ல. அது பெண் வெறுப்பின் பிரதிபலிப்பு. இதுபோல் ஒருமுறை அல்ல, பலமுறை அவர் பெண்களை அவமதிக்கும் வார்த்தைகளை பயன்படுத்தினார். அவரது நடவடிக்கைகளை நேரில் பார்த்த ஹீரோ (சுடிகாலி சுதீர்) எதுவும் பேசாமல் இருந்தது ஏமாற்றத்தை கொடுத்தது. பெண்களை அவமதிக்காத, மரியாதை குறையாத இடங்களில் மட்டுமே இனி பணியாற்ற விரும்புகிறேன்’ என்று கூறியிருந்தார்.
அவரது குற்றச்சாட்டு பரபரப்பை ஏற்படுத்தியது. இந்நிலையில், அனைத்திந்திய திரைப்பட தொழிலாளர்கள் சங்கம் திவ்யபாரதிக்கு ஆதரவு தெரிவித்துள்ளது. இதுகுறித்து சங்கம் வெளியிட்டுள்ள பதிவில், ‘திரைப்படங்களில் பணியாற்றும் எந்த பெண்ணாக இருந்தாலும், இதுபோன்ற சம்பவங்களை ஒருபோதும் பொறுத்துக்கொள்ள முடியாது. எனினும், துரதிர்ஷ்டவசமாக இதுபோன்ற சம்பவங்கள் நடந்துவிடுகின்றன. இந்த அவமானத்துக்கு எதிராக குரல் எழுப்பிய திவ்யபாரதியின் தைரியத்துக்கு பாராட்டுகள். ஓய்வுபெற்ற பெண் நீதிபதி தலைமையில், இந்திய திரைப்பட துறை முழுவதும் பெண்களின் புகார்களை கேட்டு தீர்க்க, ‘பெண்கள் குறைதீர்ப்பு குழு’ அமைக்கப்பட வேண்டும் என்று கேட்டுக்கொள்கிறோம். திவ்யபாரதியின் வழக்கை கவனத்தில் கொண்டு, கடும் நடவடிக்கை எடுக்க தேசிய மகளிர் ஆணையத்தை வலியுறுத்துகிறோம்‘ என்று தெரிவித்துள்ளது.