ஹீரோ ஆகிறார் அனுராக் காஷ்யப்

சென்னை: வேல்ஸ் பிலிம் இண்டர்நேஷனல் சார்பில் ஐசரி கே.கணேஷ் தயாரிக்கும் படம், ‘அன்கில்_123’. சமூக ஊடக புகழின் பேராசை எவ்வாறு ஒருவரது வாழ்க்கையையும், மனதையும் மாற்றுகிறது என்பதை ஆராயும் புதிய மனோதத்துவ திகில் படமாக இது உருவாகிறது. சாம் ஆண்டன் இயக்குகிறார். சாம் ஆண்டன், சவரிமுத்து இணைந்து எழுதியுள்ளனர். முதன்மை கதாபாத்திரத்தில் அனுராக் காஷ்யப் நடிக்கிறார். அவருடன் ‘பிதாமகன்’ சங்கீதா ஒரு உணர்ச்சிகரமான கேரக்டரில் நடிக்கிறார். ஜெரார்ட் ஃபெலிக்ஸ் இசை அமைக்க, கிருஷ்ணன் வசந்த் ஒளிப்பதிவு செய்கிறார். சவுந்தர்ராஜ் அரங்கம் அமைக்க, கோட்டீஸ்வரன் சண்டைப் பயிற்சி அளிக்கிறார்.

இந்த சமூகத்தில் அதிகமான புகழை பெறும் கனவுடன் தொடங்கும் ஒரு சமூக ஊடக இன்ஃப்ளூயன்சரின் வாழ்க்கை எவ்வாறு மனநிலை மாற்றத்துக்கும், அழிவுக்கும் வழிவகுக்கிறது என்பதை படம் சொல்கிறது. புகழின் அழுத்தம், தனிமை மற்றும் அடையாள இழப்பு ஆகியவை எவ்வாறு ஒருவரது உண்மையான உலகத்தை பாதிக்கிறது என்பதையும் இக்கதை பேசுகிறது. இன்றைய டிஜிட்டல் உலகில் ஒவ்வொரு பதிவுக்கு பின்னால் மறைந்திருக்கும் உணர்ச்சிகரமான போராட்டங்களையும் மற்றும் ஒப்பீடு, பொறாமை, தன்னம்பிக்கை குறைபாடு ஆகியவற்றின் மோதல்களையும் தெளிவாக சித்தரிக்கும்படி படம் உருவாக்கப்படுகிறது.