வீட்டை அடமானம் வைத்த ஆண்ட்ரியா

நடிகையும், பாடகியுமான ஆண்ட்ரியா, இன்று திரைக்கு வந்துள்ள ‘மாஸ்க்’ என்ற படத்தின் மூலம் தயாரிப்பாளராகி இருக்கிறார். இதுகுறித்து அவர் கூறுகையில், ‘சுமார் 40 படங்களில் நடித்துள்ள நான், ‘மாஸ்க்’ கதை மிகவும் நன்றாக இருந்ததால், சொக்கலிங்கம் என்பவருடன் இணைந்து தயாரித்தேன். இயக்குனர் வெற்றிமாறன் தயாரிக்கவில்லை. அட்வைஸ் மட்டுமே செய்தார். ‘இத்தனை ஆண்டுகள் கஷ்டப்பட்டு சம்பாதித்து வீடு கட்டினாய். அதை பேங்கில் அடமானம் வைத்து, லோன் வாங்கி படம் தயாரிக்க வேண்டுமா? நீ என்ன பைத்தியமா?’ என்று பலர் கேட்டனர். ‘சினிமாவில் சம்பாதித்து வாங்கிய வீட்டை, இப்போது சினிமாவுக்காக அடமானம் வைத்தேன்’ என்று அவர்களுக்கு பதில் சொன்னேன்.

நான் நடித்த ‘மனுசி’, ‘பிசாசு 2’, ‘கா’ ஆகிய படங்கள் ரிலீசாகாதது வருத்தமாக இருக்கிறது. ‘மாஸ்க்’ படம் வெற்றிபெற்று லாபம் கிடைத்தால், மிஷ்கின் இயக்கத்தில் நான் நடித்து முடங்கி கிடக்கும் ‘பிசாசு 2’ படத்தை வெளியிட முயற்சிப்பேன். நடிப்பு, தயாரிப்பை விட பாடுவது எனக்கு மிகவும் பிடித்திருக்கிறது. ராம், வெற்றிமாறன், கவுதம் வாசுதேவ் மேனன், மிஷ்கின் ஆகியோர் இயக்கத்தில் நடித்திருந்தாலும், செல்வராகவன் இயக்கிய ‘ஆயிரத்தில் ஒருவன்’ படத்துக்கு மட்டுமே நான் அதிகமாக கஷ்டப்பட்டேன். அப்படத்தில் பல காட்சிகள் 26 டேக்குகள் வரை படமாக்கப்பட்டது. ‘வட சென்னை’ படத்தின் இன்னொரு பகுதியாக ‘அரசன்’ படம் உருவாக்கப்படுகிறது. அதில் நான் நடிப்பேன் என்று நம்புகிறேன்’ என்றார்.