தவறுகளை ஒப்புக்கொண்ட லிங்குசாமி

சூர்யா, சமந்தா நடித்துள்ள ‘அஞ்சான்’ படத்தின் ரீ-எடிட் வெர்ஷன் ரிலீஸ் சம்பந்தமான நிகழ்ச்சியில் பேசிய இயக்குனர் என்.லிங்குசாமி, ‘இப்படம் 2 மணி 36 நிமிடங்கள் ஓடக்கூடியதாக இருந்தது. இப்போது 36 நிமிடங்கள் குறைக்கப்பட்டுள்ளது. இதன் ரீ-எடிட் வெர்ஷனை ரிலீஸ் செய்ய காரணம், 11 வருடங்களுக்கு முன்பு இப்படம் வெளியானபோது, முதன்முதலாக அதிகப்படியான ட்ரோல்களில் சிக்கியதுதான். இது திரையுலகை அப்படியே புரட்டிப்போடும் உலக மகா கதை என்று நான் சொன்னதில்லை. இது ஒரு படம், அவ்வளவுதான். சூர்யா ரசிகர்கள் அவரை எப்படி திரையில் பார்க்க ஆசைப்பட்டார்களோ அதெல்லாம் படத்தில் இருக்கிறது. முதன்முதலில் எங்களை ட்ரோல் செய்தவர்கள், இப்போது தயவுதாட்சண்யம் இல்லாமல் எல்லா படங்களையும் ட்ரோல் செய்கிறார்கள். அதனால் எனக்கு பயம் போய்விட்டது.

11 வருடங்களுக்கு முன்பு என்னை திட்டியதைவிடவா இப்போது அதிகமாக திட்டப்போகிறார்கள்? ட்ரோல் செய்வதால் மட்டுமே ஒரு படத்தின் வெற்றியை தடுத்து நிறுத்திவிட முடியாது. ‘ரன்’, ‘சண்டக்கோழி’ போன்ற படங்கள் அப்போது ரிலீசாகி இருந்தால், இந்த ட்ரோல்கள் என்ன செய்திருக்கும்? மக்கள் விரும்பினால், படத்தின் ஓட்டத்தை தடுக்க முடியாது. அதேவேளையில், என் பக்கமும் சில தவறுகள் இருக்கிறது. 100 சதவீதம் சரியான ஒரு படத்தை கொடுத்துவிட்டு, அதை மக்கள் புறக்கணித்து விட்டார்கள் என்று அவர்கள் மீது பழி போட விரும்பவில்லை. அதை மனப்பூர்வமாக ஒப்புக்கொள்ள வேண்டும்.

இப்படத்தில் நானும் நிறைய தவறுகள் செய்திருக்கிறேன். அதை ட்ரோல் செய்தவர்கள் பல மடங்கு பெரிதாக்கி விட்டார்கள். ரசிகர்களை ஏமாற்றுவதற்காக நாங்கள் படத்தை உருவாக்கவில்லை. சில நேரங்களில் நாங்களே ஏமாந்துவிடுகிறோம். இப்படத்தை நான் மிகவும் விரும்பி உருவாக்கினேன். எல்லா படங்களும் ‘ஆனந்தம்’, ‘ரன்’, ‘சண்டக்கோழி’ போல் வெற்றிபெறுவது இல்லை. மணிரத்னம், ஷங்கர் போன்ற இயக்குனர்களை பற்றி கூட மிகப்பெரிய அளவில் நெகட்டிவ் கருத்துகளை பரப்பி வருகிறார்கள்’ என்று வருத்தப்பட்டார்.