ரகுல் மீது மகேஷ் பாபு ரசிகர்கள் கோபம்

தமிழ் மற்றும் தெலுங்கில் புதுப்பட வாய்ப்புகள் கிடைக்காத நிலையில், இந்தியில் அதிக கவனம் செலுத்தும் ரகுல் பிரீத் சிங், தனது தோல்வி குறித்து மனம் திறந்து பேசியுள்ளார். இதுகுறித்து அவர் கூறுகையில், ‘தமிழில் ‘கஜினி’, ‘துப்பாக்கி’ போன்ற படங்களின் மூலம் ஹிட் கொடுத்த ஏ.ஆர்.முருகதாஸ், தெலுங்கில் மகேஷ் பாபுவை வைத்து ‘ஸ்பைடர்’ என்ற படத்தை இயக்கினார். இதில் மகேஷ் பாபு ஜோடியாக நடித்தேன். இதில் ஒப்பந்தமாகும்போது, இதன்மூலம் நான் முன்னணி நடிகைகளில் ஒருவராக மாறுவேன், படம் மிகப்பெரிய வெற்றிபெறும் என்று பெரிதும் நம்பினேன்.

ஆனால், ரிலீசுக்கு பிறகு படம் மிகப்பெரிய தோல்வியை சந்தித்தது. இதை நான் உள்பட படக்குழுவினர் எதிர்பார்க்கவில்லை. அதிர்ச்சி தோல்வியின் மூலம் நான் மிகப்பெரிய பாடத்தை கற்றுக்கொண்டேன். சினிமாவில் வெற்றி, தோல்வி என்பது தொடர்ந்து ஒரு அங்கமாக இருக்கும் என்பதை அப்போது புரிந்துகொண்டேன்’ என்றார். தற்போது எஸ்.எஸ்.ராஜமவுலி இயக்கும் ‘வாரணாசி’ என்ற பான்வேர்ல்ட் படத்தில் மகேஷ் பாபு நடித்து வருகிறார். இந்த நேரத்தில் ரகுல் பிரீத் சிங், மகேஷ் பாபுவின் முந்தைய படம் படுதோல்வி அடைந்தது பற்றி பேசியிருப்பது, மகேஷ் பாபுவின் ரசிகர்களை கோபப்பட வைத்துள்ளது.