மோகன்லாலை சந்திக்க அடம்பிடித்த ரசிகை

கேரளாவில் ஐமுரி பகுதியை சேர்ந்த லீலாமணி என்ற 80 வயது மூதாட்டி ஒருவர், மோகன்லாலின் தீவிர ரசிகை. ஒருமுறையாவது மோகன்லாலை பார்க்க வேண்டும் என்ற அவரது நீண்ட நாள் ஆசை தற்போது நிறைவேறியுள்ளது. மோகன்லால் நடிக்கும் ‘திரிஷ்யம் 3’ என்ற படத்தின் படப்பிடிப்பு ஐமுரி தேவாலயத்தில் நடந்தது. தங்கள் பகுதிக்கு மோகன்லால் வந்ததை அறிந்த லீலாமணி, தனது பேரனுடன் சென்றார். அங்கு ஏராளமான ரசிகர்கள் இருந்ததால், படப்பிடிப்பு நடக்கும் பகுதிக்கு யாரையும் அனுமதிக்கவில்லை. ஆனால், மோகன்லாலை சந்தித்த பிறகே அங்கிருந்து செல்வேன் என்பதில் லீலாமணி உறுதியாக இருந்தார். அன்று மாலை 5 மணி வரை தன்னை சந்திக்க ஒரு மூதாட்டி காத்திருப்பதை அறிந்த மோகன்லால், உடனே அவராகவே முன்வந்து சந்தித்தார்.

அப்போது லீலாமணி, ‘உங்களை ஒருமுறை தொட்டுக்கொள்ளட்டுமா?’ என்று கேட்க, உடனே அவரைக் கட்டியணைத்து போட்டோவுக்கு போஸ் கொடுத்த மோகன்லால், தனக்கு முன்னால் ஒரு பாடலை பாட விரும்பிய லீலாமணிக்கு அனுமதி கொடுத்தார். ஆனால், நேரமின்மை காரணமாக லீலாமணியால் பாட முடியவில்லை. இதுபற்றி லீலாமணி கூறுகையில், ‘நான் மோகன்லாலின் தீவிர ரசிகை. அவரது படங்களை பலமுறை பார்த்து ரசிப்பேன். ‘ஆறாம் தம்புரான்’ படம் எனக்கு மிகவும் பிடிக்கும். கடைசியாக ‘துடரும்’ படத்தை பார்த்தேன். ‘திரிஷ்யம்’ படத்தின் 2 பாகங்களை பார்த்து வியந்த நான், 3ம் பாகத்தை பார்க்க ஆவலுடன் காத்திருக்கிறேன்’ என்றார்.