ராஜமவுலியை ஆதரிக்கும் சர்ச்சை இயக்குனர்

மகேஷ் பாபு, பிரியங்கா சோப்ரா, பிருத்விராஜ் சுகுமாரன் நடிக்கும் ‘வாரணாசி’ என்ற பான்-வேர்ல்ட் படத்தை எஸ்.எஸ்.ராஜமவுலி இயக்குகிறார். இதன் டைட்டில் அறிவிப்பு நிகழ்ச்சியில், டீசரை ஐமேக்ஸ் திரையில் வெளியிட முயன்றபோது தொழில்நுட்ப கோளாறு ஏற்பட்டது. இதனால் நிகழ்ச்சி தடைபட்டது. அப்போது எஸ்.எஸ்.ராஜமவுலி, ‘எனக்கு கடவுள் நம்பிக்கை இல்லை. ஆனால், இங்கு பேசிய எனது தந்தை, ஹனுமன் என்னை வழிநடத்துவதாக சொன்னார். தொழில்நுட்ப கோளாறு ஏற்பட்டபோது எனக்கு கோபம் வந்தது. இப்படித்தான் ஹனுமன் எனக்கு உதவுவாரா?’ என்று பேசினார். அவரது பேச்சு பலத்த சர்ச்சையை ஏற்படுத்தியது. இந்து கடவுளை அவமதித்ததாக சொல்லி, சிலர் அவர் மீது போலீசில் புகார் கொடுத்தனர்.

கடவுள் நம்பிக்கையே இல்லை என்று சொல்பவர், தனது படத்துக்கு ‘வாரணாசி’ என்று தலைப்பு சூட்டி, புராண கதாபாத்திரங்களை பயன்படுத்தியது ஏன் என்று அவருக்கு எதிராக விமர்சனங்கள் எழுந்தன. இதையறிந்த சர்ச்சை இயக்குனர் ராம் கோபால் வர்மா, எஸ்.எஸ்.ராஜமவுலிக்கு எதிராக பரப்பப்படும் விமர்சனங்களை கடுமையாக சாடியுள்ளார். அவர் வெளியிட்ட பதிவில், ‘கடவுள் நம்பிக்கை குறித்து விமர்சிப்பவர்கள் ஒன்றை புரிந்துகொள்ள வேண்டும். தாங்கள் நம்புவதாக சொல்லும் உரிமையை போலவே, நம்பவில்லை என்று சொல்ல அவருக்கு உரிமையுண்டு. இப்போது, ‘அவர் கடவுளை நம்பவில்லை என்றால், அவர் ஏன் தனது படங்களில் கடவுளை காட்டுகிறார்?’ என்று கேட்பது முட்டாள்தனமான வாதம். அந்த தர்க்கத்தின்படி, ஒரு கேங்ஸ்டர் படத்தை உருவாக்க, இயக்குனர் கேங்ஸ்டராக மாற வேண்டுமா? திகில் படம் இயக்க, பேயாக மாற வேண்டுமா?’ என்று காட்டமாக கேள்வி எழுப்பியுள்ளார். அவரது கேள்வி நியாயமானது என்று சிலர் கமென்ட் வெளியிட்டுள்ளனர். எனினும், எஸ்.எஸ்.ராஜமவுலியை பலர் கடுமையாக விமர்சித்து வருகின்றனர்.