ஸ்ரத்தாவின் சகோதரரான இயக்குனருக்கு சம்மன்: ரூ.252 கோடி போதைப் பொருள் வழக்கில் திருப்பம்

மும்பை: நிழல் உலக தாதாவுடன் தொடர்புடைய கோடிக்கணக்கான ரூபாய் போதைப்பொருள் வழக்கில், பிரபல நடிகரின் மகனும் இயக்குனருமான சித்தாந்த் கபூருக்கு மும்பை போலீசார் சம்மன் அனுப்பியுள்ளனர். கர்நாடக மாநிலம் பெங்களூருவில் கடந்த 2022ம் ஆண்டு போதைப்பொருள் பயன்படுத்தியதாக நடிகர் சக்தி கபூரின் மகனும், நடிகை ஷ்ரத்தா கபூரின் அண்ணனுமான சித்தாந்த் கபூர் பிடித்துச் செல்லப்பட்டுப் பின்னர் விடுவிக்கப்பட்டார். இந்நிலையில், மகாராஷ்டிராவில் சமீபத்தில் சிக்கிய ரூ.252 கோடி மதிப்பிலான மெபெட்ரோன் போதைப்பொருள் மற்றும் சட்டவிரோத பணப்பரிமாற்ற வழக்கில், நிழல் உலக தாதா தாவூத் இப்ராஹிம் கும்பலுக்குத் தொடர்பு இருப்பது கண்டறியப்பட்டது பெரும் பரபரப்பை ஏற்படுத்தியது.

இந்த வழக்கில் முக்கியக் குற்றவாளியான ‘லவிஷ்’ என்கிற முகமது சலீம் முகமது சுஹைல் ஷேக் துபாயிலிருந்து நாடு கடத்தப்பட்டு விசாரிக்கப்பட்ட நிலையில், அவரது வாக்குமூலத்தின் அடிப்படையில் இயக்குனர் சித்தாந்த் கபூரை விசாரணைக்கு ஆஜராகுமாறு மும்பை போதைப் தடுப்புப் பிரிவு போலீசார் உத்தரவிட்டுள்ளனர். விசாரணையின் போது, இந்தியா மற்றும் துபாய், தாய்லாந்து போன்ற வெளிநாடுகளில் தான் நடத்திய ஆடம்பர விருந்துகளில் திரைத்துறையைச் சேர்ந்த பல பிரபலங்கள் கலந்து கொண்டதாகவும், அங்கு போதைப்பொருள் விநியோகம் செய்யப்பட்டதாகவும் குற்றம் சாட்டப்பட்ட சலீம் வாக்குமூலம் அளித்துள்ளார். அவரது வாக்குமூலத்தில் சித்தாந்த் கபூர் மட்டுமின்றி, நடிகை நோரா ஃபதேஹி, ஷ்ரத்தா கபூர், சமூக ஊடகப் பிரபலம் ஓரி, இயக்குநர்கள் அப்பாஸ்-மஸ்தான் மற்றும் அரசியல்வாதி ஜீஷன் சித்திக் ஆகியோரின் பெயர்களும் அடிபடுவதாகத் தகவல்கள் வெளியாகியுள்ளன. இதன் அடிப்படையில் வரும் 25ம் தேதி விசாரணைக்கு ஆஜராகச் சொல்லி சித்தாந்த் கபூருக்கு சம்மன் அனுப்பப்பட்டுள்ளது.