விசில் அடித்த ரசிகர்கள் எச்சரித்த அஜித்: இவர்தான் ஹீரோ நெட்டிசன்கள் பாராட்டு

சென்னை: புதிய படத்தை தள்ளி வைத்து அஜித் தற்போது கார் ரேஸில் முழுமையாக கவனம் செலுத்தி வருகிறார். தொடர்ந்து ஒவ்வொரு நாட்டில் நடைபெறும் கார் பந்தயத்தில் போட்டியிட்டு, டாப் 3 இடங்களில் ஒரு இடத்தை அவரது அணி தக்க வைத்து வருகிறது. ஒரு பக்கம் சினிமா மறுபக்கம் கார் ரேஸ் என அஜித் கலக்கிக்கொண்டிருந்தாலும், அவருடைய அடுத்த படத்தின் அறிவிப்பை எதிர்பார்த்து ரசிகர்கள் அனைவரும் ஆவலுடன் காத்திருக்கின்றனர்.

ஆதிக் ரவிச்சந்திரன் இயக்கும் இப்படத்தின் அதிகாரப்பூர்வ அறிவிப்பு இம்மாதம் இறுதிக்குள் வெளிவரும் என கூறப்படுகிறது.

நடிகர் அஜித் வெளிநாட்டில் கார் ரேசிங்கில் இருக்கும்போது, அவரை சந்திக்க ரசிகர்கள் அங்கு செல்கிறார்கள். அப்போது எடுக்கப்படும் வீடியோக்கள் கூட அவ்வப்போது வெளிவருகிறது. மோட்டார் ஸ்போர்ட்ஸை அனைவரிடமும் கொண்டு செல்லுங்கள் என அவர் கூறிய வீடியோ கூட வைரலானது.

இந்த நிலையில், அஜித்தை சந்திக்க சென்றிருந்த ரசிகர்கள் தூரத்திலிருந்து அவரை பார்த்தவுடன், சத்தம்போட்டு கூச்சலிட்டனர். பின் ரசிகர்கள் சிலர் விசில் அடித்தனர். ரசிகர்கள் இப்படி ஆர்ப்பரித்தபோது அஜித் கடுப்பாகிவிட்டார். அஜித்தின் முகமே மாறிவிட்டது. அதன்பின், விசில் அடிக்காதீர்கள் என அஜித் விரலை காட்டி எச்சரித்தார். அந்த வீடியோ தற்போது இணையத்தில் வைரலாகி வருகிறது. இதைப் பார்த்த நெட்டிசன்கள், ‘‘ஹீரோ என்றால் ரசிகர்களை கட்டுப்பாட்டில் வைத்திருக்க வேண்டும். அந்த விஷயத்தில் அஜித்தான் பெஸ்ட்’’ என கருத்து கூறி வருகிறார்கள்.